கோவில்பட்டி இந்து அறநிலைத்துறைக்கு சொந்தமான ஸ்ரீ சுந்தர்ராஜ பெருமாள் கோயில் இன்று மகா கும்பாபிஷேகம் நடைபெற்றது இதில் கோவில்பட்டி மற்றும் சுற்றுவட்டாரப் பகுதியைச் சேர்ந்த திரளான பக்தர்கள் கலந்து கொண்டு சுவாமி தரிசனம் செய்தனர்  

துாத்துக்குடி மாவட்டம் கோவில்பட்டி இந்து சமய அறநிலைத்துறை உட்பட்ட பூவன நாதசுவாமி திருக்கோயில் உடன் இணைந்த அருள்மிகு பூமிதேவி-நீலாதேவி சமேத சுந்தரராஜ பெருமாள் திருக்கோயில் மகா கும்பாபிஷேக பெருவிழா  நேற்று முன்தினம் 4 கால யாகசாலை பூஜைகள் தொடங்கியது. இன்று விஷ்வக்ஸேனர், ஆராதனம், புண்யாஹ வாசனம், கோ பூஜை, விஸ்வரூபம், த்வார பூஜை, பாலிகா பூஜை, கலச ஆராதனம் மற்றும் 4ம் கால ஹோம பூஜைகளும் இன்று நடைபெற்றது. இதனை தொடர்ந்து மேளதாளம் முழங்க புனித நீர் எடுத்துச் செல்லப்பட்டு பூமிதேவி-நீலாதேவி சமேத சுந்தரராஜப் பெருமாள் மற்றும் பரிவார மூர்த்திகள்  விமான கோபுரங்களுக்கு ஊற்றப்பட்டு மகா கும்பாபிஷேகம் நடைபெற்றது. இதனை தொடர்ந்து பூமிதேவி-நீலாதேவி சமேத சுந்தரராஜப் பெருமாள் மற்றும் பரிவார மூர்த்திகளுக்கு சிறப்பு அபிஷேகம் மற்றும் அலங்கார தீபாரதனை நடைபெற்றது. இதில் முன்னாள் அமைச்சரும் கோவில்பட்டி சட்டமன்ற உறுப்பினருமான கடம்பூர் செ.ராஜூ, நகர் மன்ற தலைவர் கருணாநிதி மற்றும் திரளாக பக்தர்கள் கலந்து கொண்டு சுவாமி தரிசனம் செய்தனர்.