வெளியானது வலிமை அப்டேட் : தலைக்கவசத்துடன் "தல" -  இரசிகர்கள் கொண்டாட்டம்.

அஜித் ரசிகர்கள் ஆவலுடன் காத்திருந்த வலிமை அப்டேட் வெளியாகி உள்ளது‌. மோஷன் போஸ்டராக வெளியாகி இருக்கும்  வீடியோவைப் பகிர்ந்து கொண்டாடி வருகின்றனர். இன்று மாலை 6 மணிக்கு வலிமை அப்டேட்  மோஷன் போஸ்டர் வெளியாகி உள்ளது.

தலைக்கவசத்தில் தல அஜித் இருக்கும் படத்துடன் வீடியோ தொடங்குகிறது. அதன் கண்ணாடியில் அஜித் பின்புறமாக நிற்கும் அதிரடியான  படத்துடன் நகர்கிறது. அதன் பிறகு "Power is a state of Mind" என்ற வாசகத்துடன் கூடிய அஜித் படங்களுடன் முடியும் வீடியோவின் கடைசியில், அஜித்தின் பைக் ஸ்டண்ட் காட்சி இருப்பது அவரது இரசிகர்கள் மகிழ்ச்சியுடன் பகிர்ந்து வருகிறார்கள். 2021ல் படம் வெளியாகும் என்ற அறிவிப்பும் ஆர்வத்தை அதிகரித்துள்ளது.

அஜித் நடிப்பில்  வலிமை திரைப்படத்தை வினோத் இயக்கி வருகிறார். நேர்கொண்ட பார்வை திரைப்படத்திற்கு பிறகு, அஜித்துடன் வினோத் மற்றும் போனி கபூர் இணைந்துள்ள இப்படத்திற்கு ஆரம்பம் முதலே அதிக எதிர்பார்ப்பு நிலவி வருகிறது. அதனால் வலிமை படத்தின் அப்டேட் கேட்டு ரசிகர்கள் மாதக்கணக்கில் காத்திருந்தனர். 

போனி கபூர்  டிவிட்டர் கணக்கில் அப்டேட் கேட்டு பதிவிட்டு வந்த ரசிகர்கள், அது பற்றி எந்த அப்டேட்டும் கிடைக்காததால் விரக்தி அடைந்தனர். அதனால் விஐபிக்கள், அரசியல்வாதிகளின் நேரலை முதல் கிரிக்கெட் மற்றும் கால்பந்து நடக்கும் மைதானங்கள் வரை அப்டேட் கேட்டு கவனம் ஈர்த்தனர். 

இந்நிலையில் இன்று மாலை வலிமை படத்தின் மோஷன் போஸ்டர் வெளியாகும் என தகவல் கசிந்தது. அதனை வழக்கம் போல் டிரெண்ட் செய்து வந்த அஜித் ரசிகர்களுக்கு இன்ப அதிர்ச்சி அளிக்கும் வகையில் மோஷன் போஸ்டர் வெளியாகி உள்ளது.‌  மேலும்  கொரோனா பரவல் காரணமாகத் தடைபட்டிருந்த வலிமை படத்தின் ஷூட்டிங்கும் ஹைதராபாத்தில் தொடங்கியிருக்கும் தகவல் இரட்டிப்பு மகிழ்ச்சியைத் தந்துள்ளது.

இதனை கொண்டாடும் விதமாக  #ValimaiMotionPoster என்ற ஹேஸ்டேக்கை அஜித் ரசிகர்கள் ட்ரெண்ட் செய்து வருகின்றனர். யுவன்சங்கர் ராஜா இசையமைக்கும் இப்படத்திற்கு காலா படத்தில் நடித்த பாலிவுட் நடிகை ஹுமா குரேஷி அஜித்திற்கு ஜோடியாக நடித்துள்ளார்.