வெளியானது கமலஹாசனின் விக்ரம் படத்தின் வெறித்தனமான பர்ஸ்ட் லுக்

லோகேஷ் கனகராஜ் இயக்கத்தில் கமலஹாசன் நடிக்கும் விக்ரம் படத்தின் பர்ஸ்ட்லுக்  போஸ்டர் வெளியாகி உள்ளது.

உலகநாயகன் கமல்ஹாசன் நடிக்கும் விக்ரம் திரைப்படத்தின் பெயரை, அட்டகாசமான டீஸர் ஒன்றின் மூலம் வெளியிட்ட படக்குழு, தற்போது படத்தின் அதிரடியான ஃபர்ஸ்ட் லுக் போஸ்டரை  வெளியிட்டுள்ளது.  

இந்த போஸ்டர் கமல், விஜய் சேதுபதி, ஃபகத் பாசில்  ஆகியோரின் முகங்களுடன்  வெளியாகி உள்ளது. அனல் பறக்கும் இந்த ஃபர்ஸ்ட் லுக் போஸ்டர், ரசிகர்கள் மத்தியில் பெரும் வரவேற்பைப் பெற்றதுள்ளது. இதனால்  சமூக வலைதளத்தில் விக்ரம் படத்தின் பர்ஸ்ட்லுக்கை கொண்டாடி, டிரெண்ட் செய்து வருகிறார்கள்.

கொரோனா தொற்றுப் பரவல் காரணமாகவும், கமலஹாசனின் அரசியல் பணி காரணமாகவும் தொடங்காமல் இருந்த ‘விக்ரம்’ திரைப்படத்தின் படப்பிடிப்பு விரைவில் தொடங்கும் என்று எதிர்பார்க்கப்படுகிறது.  கமலஹாசனுடன்  ஃபஹத் பாசில், விஜய் சேதுபதி அர்ஜுன் தாஸ், நரேன் ஆகியோர்  இத்திரைப்படத்தில் முக்கியக் கதாபாத்திரங்களில் நடிக்கிறார்கள்.

அனிருத் இசையமைக்கும் இப்படத்தினை, கமலின் ராஜ்கமல் நிறுவனத்துடன் இணைந்து டர்மரீக் மீடியா நிறுவனமும் தயாரிக்கிறது. 

இதன் பர்ஸ்ட்லுக் போஸ்டரை "வீரமே வாகையைச் சூடும். மீண்டும் துணிகிறேன், நம் இளம் திறமைகளை உம் முன் சமர்ப்பிக்க. நேற்றே போல நாளையும் நமதாக வாழ்த்தட்டும் தாயகம். விக்ரம்… விக்ரம்…"  என்று தலைப்பிட்டு கமல்ஹாசன் பகிர்ந்துள்ளார். 

மாநகரம், கைதி, மாஸ்டர் என்று தொடர் வெற்றிப்படங்களை இயக்கிய இப்படத்தின் இயக்குனர் லோகேஷ் கனகராஜ் " யுத்தத்தால் அதோ அதோ விடியுது, சத்தத்தால் அராஜகம் அழியுது, இரத்தத்தால் அதோ தலை உருளுது,சொர்க்கங்கள் இதோ இதோ தெரியுது, துடிக்குது புஜம்! ஜெயிப்பது நிஜம் ! " என்ற தலைப்புடன் பர்ஸ்ட் லுக்கைப் பகிர்ந்துள்ளார்

நடிப்பில் அசுரத்தனமாய் மிரட்டும் கமல்ஹாசன், பகத் பாசில் மற்றும் விஜய்சேதுபதி ஆகியோர் ஒன்றாய் மிரட்டியிருக்கும் இந்த பர்ஸ்ட்லுக் போஸ்டர்,  படத்தின் எதிர்பார்ப்பை எகிற வைத்துள்ளதால் டிரெண்டிங்காகி வருகிறது.