நடிகர் திலகத்தின் பிறந்த நாளைக் கௌரவித்த கூகுள் டூடுல் 

நடிகர் திலகம் செவாலியோ சிவாஜி கணேசனின் 93வது பிறந்த நாளைக் கொண்டாடும் விதமாக, கூகுள் தனது முகப்பு பக்கத்தில் சிவாஜி டூடுல் வெளியிட்டு கௌரவித்துள்ளது.

கூகுள் நிறுவனம் தனது முகப்பு பக்கத்தில் உலகின் தலைசிறந்த தலைவர்கள், கலைஞர்கள், அறிவியல் அறிஞர்களின் பிறந்தநாளுக்கு அவர்களை சிறப்பிக்கும் விதமாக,  டூடுள்  கார்ட்டூன்களை வெளியிட்டு வருகிறது. இது பலரையும் கவர்ந்த ஒன்றாக இருந்து வருகிறது.

இந்நிலையில், உலகின் தலைசிறந்த நடிகர்களில் ஒருவரான நமது நடிகர் திலகத்தின் பிறந்தநாள் இன்று கொண்டாடப்படுகிறது. அதனைச் சிறப்பிக்கும் வகையில், கூகுள் நிறுவனம் சிவாஜியின் டூடுலை தனது முகப்பக்கத்தில்  வெளியிட்டுள்ளது. 

சிவாஜியின் வாழ்க்கை வரலாற்றுச் சுருக்கத்தை வெளிப்படுத்தும் இந்த டூடுலை,பெங்களூரைச் சேர்ந்த ஓவிய கலைஞர் நூபூர் ராஜேஷ் சோக்ஸியால் உருவாக்கியுள்ளார் என்பது குறிப்பிடத்தக்கது.  இந்த டூடுலைக் கண்டவர்கள் அதனைப் பகிர்ந்து கொண்டாடி வருகின்றனர்.

சிவாஜியின் பேரனும், நடிகர் பிரபுவின் மகனுமான நடிகர் விக்ரம் பிரபு இந்த டூடுலைப் பகிர்ந்து, கூகுளுக்கும் உருவாக்கிய கலைஞருக்கும் நன்றியைத் தெரிவித்துள்ளார்.