மும்பை டெஸ்ட்:   இந்தியா அணி சாதனை வெற்றி - 372 ரன்கள் வித்தியாசத்தில் நியூசிலாந்தை வீழ்த்தி டெஸ்ட் ரேங்கிங்கில் முதலிடத்திற்கு முன்னேறியது இந்தியா 

நியூசிலாந்துக்கு எதிரான மும்பை டெஸ்ட் போட்டியில் 372 ரன்கள் வித்தியாசத்தில் அபார வெற்றி பெற்ற இந்தியா, 1-0 என்ற கணக்கில் கோப்பையை வென்றது. இதன் மூலம் உலக டெஸ்ட் தரவரிசையில் இந்தியா மீண்டும் முதலிடத்திற்கு முன்னேறியுள்ளது.

ஜெயந்த் யாதவ் நான்கு விக்கெட்டுகளை வீழ்த்தியதன் மூலம் நான்காவது நாள் ஆட்டம் தொடங்கிய முதல் ஒரு மணி நேரத்தில் நியூசிலாந்தை 167 ரன்களுக்கு சுருட்டிய இந்திய அணி மும்பையில் 372 ரன்கள் வித்தியாசத்தில் வெற்றி பெற்றது. இது ரன்கள் வித்தியாசத்தில்   இந்தியா பெற்ற மிகப்பெரிய வெற்றியாகும், மேலும்  நடந்த இரண்டு போட்டிகள் கொண்ட தொடரை 1-0 என கைப்பற்றி கோப்பையை வென்றுள்ளது.

5 விக்கெட் இழப்பிற்கு 140 ரன்கள் என்ற ஸ்கோருடன் ஆட்டத்தை தொடங்கிய நியூசிலாந்தின் லோயர் ஆர்டரை ஜெயந்த்  துவம்சம் செய்ய, இந்தியாவுக்கு 7 ஓவர்கள் தேவைப்பட்டது. இன்று காலை அவ்வப்போது பவுண்ட்ரிகள் கொடுத்தாலும்,  ஜெயந்த் யாதவ் தொடர்ந்து நல்ல பந்துகளை வீசி நியூசிலாந்து வீரர்களை திணற வைத்தார்.

 வான்கடேயில் இருந்த காலை நேர ஈரப்பதம், நியூசிலாந்து வீரர்களுக்கு  அதை இன்னும் கடினமாக்கியது. முதல் டெஸ்ட்டில் சிறப்பான தடுப்பாட்டத்தை வெளிப்படுத்திய ரச்சின் ரவீந்திராவிற்கு, இன்று பெரும் சவாலாக இருந்தது. ஒன்றிரண்டு பவுண்ட்ரிகள்  விளாசினாலும், நிறைய முறை பந்தை துரத்தி சென்று எட்ஜ்ஜில் இருந்து தப்பினார்.  கடும் போராட்டத்திற்கு பிறகு, ஜெயந்த் யாதவ் பந்தில் இரண்டாவது ஸ்லிப்பில் புஜாராவிடம்  எட்ஜ்  கொடுத்து 18 ரன்களில் முதல் ஆளாக வெளியேறினார்.

33 ரன்கள் சேர்த்த இந்த பாட்னர்ஷிப்பை முறியடித்தவுடன், நியூசிலாந்து அணி சரிவை நோக்கி விரைவாகச் சென்றது. ஜெயந்த் தனது அடுத்த ஓவரில் கைல் ஜேமிசன் மற்றும் டிம் சவுத்தி  இருவரையும் வெளியேற்ற, இந்தியா வெற்றியை நெருங்கியது. வில் சோமர்வில்லை ஷார்ட் லெக் திசையில் நின்ற அகர்வால் கேட்ச் பிடிக்க, ஜெயந்த் 4-49 என்று தனது சிறப்பான பந்துவீச்சைப் பதிவு செய்தார். ஆனால் மறுபுறம் பல முறை அவுட் வாய்ப்புகளில் இருந்து அதிஷ்டத்தால் தப்பி பிழைத்து 44 ரன்கள் சேர்த்த ஹென்றி நிக்கோல்ஸ் அரைசதத்தை அடிக்கும் நோக்கத்தில் இறங்கி ஆடி, அஸ்வின் பந்தில் ஸ்டம்பிங்கில் அவுட் ஆக, நியூசிலாந்து ஆல் அவுட் ஆனது. 

இதன் மூலம் இந்திய அணி 372 ரன்கள் வித்தியாசத்தில் வெற்றி பெற்று இரண்டு போட்டிகள் கொண்ட டெஸ்ட் தொடரை வென்றது. நிக்கோல்ஸ் விக்கெட்டை வீழ்த்திய அஸ்வின் டெஸ்ட் போட்டிகளில் இந்தியாவில் 300 விக்கெட்டுகள் என்ற மைல் கல்லை எட்டினார். முரளிதரனுக்குப் பிறகு சொந்த நாட்டில் வேகமாக 300 விக்கெட் வீழ்த்திய இரண்டாவது வீரர் என்ற பெருமையைப் பெற்றார்.