சார்பட்டா பரம்பரை : திரைப்பிரபலங்களின் விமர்சனம்

அமேசான் ப்ரைமில் பா.இரஞ்சித் இயக்கத்தில் சார்பட்டா பரம்பரை திரைப்படம் வெளியாகி இருக்கிறது. ஆர்யா மற்றும் பசுபதி முன்னணி வேடங்களில் நடித்துள்ள இப்படத்திற்கு சந்தோஷ் நாராயணன் இசையமைத்துள்ளார். நேற்று வெளியான இத்திரைப்படத்தை பெருவாரியான இரசிகர்கள் கொண்டாடி வருதின்றனர். இந்த ஆண்டின் சிறந்த திரைப்படமாகவும், பா.இரஞ்சித்தின் படைப்புகளில் முதன்மையானது என்றும் திரைப்பிரபலங்கள் பாராட்டி வாழ்த்து தெரிவித்துள்ளனர்

இயக்குனர், நடிகர் மற்றும் தயாரிப்பாளரான சசிக்குமார், அமேசான் ப்ரைமில் வெளியான இப்படக்குழுவினருக்கு தனது வாழ்த்துக்களை தெரிவித்துள்ளார்

நிகழ்கால திரையுலகில் முன்னணி இயக்குனர்களில் ஒருவரான செல்வராகவன் "அருமையான திரைப்படம்‌ இரஞ்சித். ஒவ்வொரு காட்சியும் அருமையாக உள்ளது. ஆர்யா ஒவ்வொரு ப்ரேமிலும் சிறப்பாக நடித்துள்ளார். உங்களுக்காக மகிழ்ச்சியடைகிறேன் " என்று பதிவிட்டுள்ளார்

வெண்ணிலா கபடிக்குழு, இராட்சசன், ஜீவா திரைப்படங்களில் சிறப்பான நடிப்பை வெளிப்படுத்திய நடிகர் விஷ்ணு விஷால், தனது நண்பர்  ஆர்யாவை வாழ்த்தி பதிவிட்டுள்ளார். இரஞ்சித் சிறந்த இன்ஸ்பயரிங் ஸ்டோரியை வழங்கியுள்ளார். சந்தோஷ் நாராயணனின் இசை படத்தை மேலும் சிறப்பாக்குகிறது என்று குறிப்பிட்டுள்ளார்.

திரைப்படங்களில் சமூக கருத்துக்களை விதைத்து வரும் முன்னணி நடிகரும் இயக்குனருமான சமுத்திரக்கனி "சார்பட்டா…….. வென்றோம்….  தாறுமாறு…  என்று  பதிவிட்டு கொண்டாடி உள்ளார்.

இயக்குனர் பா.ரஞ்சித்தின் பாசறையிலிருந்து பரியேறும் பெருமாள் படத்தால் இயக்குனராக அறிமுகமான, கர்ணன் பட இயக்குனர் மாரி செல்வராஜ் "⁦சார்பட்டா பரம்பரை பார்த்தேன். ரோசமான மக்களின் ரோசமான வாழ்வியலை ஆக்ரோசமான கலையாக்கி பெரும் கலைத்தாண்டவம் ஆடியிருக்கிறார் அண்ணண் ⁦@beemji⁩ ♥️♥️  அத்தனை உழைப்பு அத்தனை வியப்பு வாழ்த்துக்கள் அண்ணா. சாத்தியபடுத்திய மொத்த படக்குழுவிற்கும் ப்ரியமும் அன்பும். ♥️♥️ அத்தனை உழைப்பு அத்தனை வியப்பு வாழ்த்துக்கள் அண்ணா. " என்று மகிழ்ச்சியாய்ப் பதிவிட்டுள்ளார்.

இரஞ்சித்தின் குருநாதரான சென்னை28 பட இயக்குனர் வெங்கட் பிரபு  இரஞ்சித்தை நினைத்து தான் பெருமைப்படுவதாக பதிவிட்டுள்ளார். ஆர்யாவின் நடிப்பை பாராட்டியுள்ளார். 

பா.இரஞ்சித் எதிரான நிலைப்பாடு உடையவராக பார்க்கப்படும் திரௌபதி இயக்குனர் மோகன்ஜியும் சார்பட்டா பரம்பரையைப் பாராட்டிப் பதிவிட்டுள்ளார்
அதில் " இயக்குனர் இரஞ்சித்தின் உழைப்பு திரையில் மிளிர்கிறது. ஆர்யா சிறப்பாக நடித்துள்ளார். தொழில்நுட்ப கலைஞர்கள் நேரத்தியான படைப்பை வழங்கி உள்ளனர்" என்று குறிப்பிட்டுள்ளார்.

வெண்ணிலா கபடிக்குழு இயக்குனர் சுசீந்திரன் தன் கைப்பட வாழ்த்தொன்றை எழுதி வெளியிட்டுள்ளார். அதில் "இரஞ்சித்தின் சிறந்த படைப்பு இது. திரையில் காண முடியாதது வருத்தம் அளிக்கிறது " என்று கூறி, ஆர்யா, பசுபதி, மற்றும் திரைத் தொழில்நுட்ப கலைஞர்களையும் பாராட்டியுள்ளார்.

சார்பட்டா படத்தை வாழ்த்தி பாராட்டியவர்களுக்கும், விமர்சனம் செய்தவர்களுக்கும்  இயக்குனர் பா.இரஞ்சித் மற்றும் ஆர்யா நன்றி தெரிவித்துள்ளனர்.