சாத்தான்குளம் அருகேயுள்ள ஸ்ரீவெங்கடேசபுரம் உடையாண்டி தெருவை சேர்ந்தவர் சுப்பிரமணியன்விவசாயி, இவருக்கு மனைவி விஜயா(52) மற்றும் 5 மகள்கள், ராம்லெட்சுமணன் என்ற மகன் உள்ளனர். இவர்களில் மகன் ராம்லெட்சுமணன், நெல்லையில் உள்ள பாலிடெக்னிக் கல்லூரியில் 2ம் ஆண்டு படித்து வந்தார். இதனிடையே கல்லூரிக்கு செல்வதற்கு வசதியாக புதிய பைக் வாங்கித்தருமாறு தனது தாயிடம் கேட்டுள்ளார். ஆனால் படிப்பு முடித்த பின்னர் வாங்கித்தருவதாக மகனிடம் தாய் கூறியதாக தெரிகிறது.

இதனை ஏற்க மனமில்லாமல் விரக்தி அடைந்த மாணவர் ராம்லெட்சுமணன், கடந்த 26ம்தேதி வயலுக்கு பயன்படுத்தும் பூச்சிக்கொல்லி மருந்தை குடித்து மயங்கி விழுந்தார். குடும்பத்தினர் உடனடியாக அவரை மீட்டு நெல்லை அரசு மருத்துவமனையில் சேர்த்தனர். அங்கு சிகிச்சை அளித்தும் பலனின்றி  ராம்லெட்சுமணன்  உயிரிழந்தார்.

இதுகுறித்து அவரது தாய் விஜயா அளித்த புகாரின்பேரில் சாத்தான்குளம் சிறப்பு எஸ்.ஐ. முருகேசன் வழக்குப்பதிவு செய்தார். இன்ஸ்பெக்டர் இயேசு ராஜசேகரன் விசாரணை நடத்தி வருகிறார்.